Presidenti i SHBA-së, Donald Trump, ka shprehur gatishmërinë për të zhvilluar një takim trepalësh me presidentët e Rusisë dhe Ukrainës, Vladimir Putin dhe Volodymyr Zelensky, më 22 gusht, për të diskutuar mundësinë e një marrëveshjeje paqeje, raporton Axios.

Gjatë një bisede telefonike, Trump ka propozuar një samit të drejtpërdrejtë, ku të dy liderët të diskutojnë një marrëveshje e cila mund të përfshijë dorëzimin e pjesës tjetër të Donbasit nga Ukraina në këmbim të armëpushimit dhe garancive të sigurisë për vendin dhe Evropën.

Takimi i fundit i Trump me Putinin në bazën ushtarake Elmendorf-Richardson në Alaska zgjati rreth tre orë dhe u cilësua si “shumë produktiv”. Nga pala ruse morën pjesë ndihmësi i Kremlinit Yury Ushakov dhe ministri i Jashtëm Sergey Lavrov, ndërsa SHBA u përfaqësua nga Sekretari i Shtetit Marco Rubio dhe i Dërguari Special Steve Witkoff.

Pas këtij takimi, Trump ka kontaktuar Zelenskyn dhe udhëheqësit evropianë për të diskutuar mundësitë për një zgjidhje të qëndrueshme të konfliktit. Trump dhe Zelensky pritet të takohen personalisht në Shtëpinë e Bardhë më 18 gusht për të avancuar bisedimet drejt një marrëveshjeje paqeje.