Policia e Kosovës ka raportuar se vetëm gjatë 24 orëve të fundit janë evidentuar tetë raste të dhunës në familje në qytete të ndryshme të vendit, përfshirë Prishtinën, Podujevën, Lipjanin, Suharekën, Istogun dhe Pejën. Të përfshirë në këto raste janë gra, burra, madje edhe fëmijë.

Një nga rastet më të rënda është raportuar në Istog, ku një grua u sulmua fizikisht nga bashkëshorti i saj pas një mosmarrëveshjeje. Në incident ndërhyri edhe djali i saj, duke u përfshirë në përleshje. Të dyshuarit u arrestuan, dhe pas intervistimit, njëri u dërgua në mbajtje, ndërsa tjetri u la i lirë në procedurë të rregullt.

Në Podujevë, një burrë u arrestua pasi sulmoi fizikisht bashkëshorten e tij. Viktima mori trajtim mjekësor dhe më pas u kthye në shtëpinë e saj bashkë me fëmijët. I dyshuari është dërguar në mbajtje me vendim të prokurorit.

Në Prishtinë, u raportuan tri raste:
• Një grua u sulmua fizikisht nga bashkëshorti i saj, i cili ishte nën ndikimin e alkoolit. Ai u arrestua dhe u lirua në procedurë të rregullt.
• Në një tjetër rast, një burrë raportoi se bashkëshortja e tij nuk po përfillte aktvendimin e gjykatës. Gruaja u intervistua dhe u lirua.
• Po ashtu, një grua raportoi se ishte kanosur përmes telefonit nga ish-partneri, i cili është në arrati.

Në Lipjan, një burrë u sulmua nga ish-bashkëshortja e tij me të cilën është në proces divorci. Gruaja u lirua në procedurë të rregullt pas intervistimit.

Në Suharekë, një burrë u arrestua pasi kanosi vëllanë dhe motrën e tij nën ndikim të alkoolit. Me vendim të prokurorit, ai u dërgua në mbajtje.

Ndërkohë në Pejë, një rast tjetër i dhunës në familje përfundoi me arrestimin e një burri, i cili u lirua më pas në procedurë të rregullt.

Policia ka njoftuar se të gjitha rastet janë nën hetim dhe janë informuar prokuroritë përkatëse.