Takimi i planifikuar për këtë javë mes Sekretarit amerikan të Shtetit, Marco Rubio, dhe ministrit të Jashtëm rus, Sergei Lavrov, është shtyrë për arsye të panjohura, duke hedhur dyshime mbi zhvillimin në të ardhmen e afërt të samitit mes presidentit të SHBA-së, Donald Trump, dhe presidentit rus, Vladimir Putin.

Ky zhvillim vjen pasi Trump deklaroi pas një telefonate me Putinin se ata ranë dakord për një takim të Këshilltarëve të Nivelit të Lartë javën e ardhshme, me udhëheqjen e Sekretarit Rubio dhe disa personave të tjerë. Megjithatë, burimet nga Shtëpia e Bardhë thanë për CNN se takimi Rubio-Lavrov është pezulluar për momentin.

Sipas burimeve, arsyeja e shtyrjes lidhet me pritjet e ndryshme mes palëve rreth një përfundimi të mundshëm të pushtimit rus në Ukrainë. Ende nuk është e qartë se si kjo do të ndikojë në organizimin e samitit të pritur Trump-Putin në Budapest, Hungari.

Zëvendëssekretarja e shtypit e Shtëpisë së Bardhë, Anna Kelly, deklaroi për CNN se Trump ka punuar për të gjetur një zgjidhje paqësore dhe diplomatike për konfliktin në Ukrainë dhe është i angazhuar për të ndalur dhunën.

Rubio dhe Lavrov patën një bisedë telefonike të hënën, ku diskutuan “hapat e ardhshëm” pas telefonatës midis Trump dhe Putin. Ndërsa Departamenti i Shtetit të SHBA-së thekson rëndësinë e bashkëpunimit për një zgjidhje të qëndrueshme të luftës, Kremlini e përshkroi telefonatën si “diskutim konstruktiv”.

Megjithatë, burime të afërta me çështjen thanë për CNN se pozicioni rus nuk ka ndryshuar mjaftueshëm dhe Rubio nuk pritet të rekomandojë zhvillimin e takimit Trump-Putin javën e ardhshme, megjithëse bisedimet midis Rubio dhe Lavrov mund të vazhdojnë.

Ka kaluar më shumë se dy muaj nga samiti i fundit ballë për ballë mes Trump dhe Putin në Anchorage, Alaska, i cili përfundoi pa marrëveshje. Që atëherë, Trump ka bërë thirrje që lufta mes Ukrainës dhe Rusisë të ndalet menjëherë.