Një situatë e tensionuar diplomatike është krijuar në Zvicër, pasi një delegacion rus, përfshirë zyrtarë nën sanksione, mori pjesë në një samit të mbajtur në Gjenevë. Pjesëmarrja e tyre ka shkaktuar reagime të ashpra dhe largim demonstrativ të disa politikanëve evropianë nga salla.

Kryetarja e Këshillit të Federatës së Rusisë, Valentina Matviyenko, e cila ndodhet nën sanksione ndërkombëtare, udhëtoi drejt Gjenevës më 27 korrik për të marrë pjesë në këtë ngjarje. Gjatë fjalimit të saj në selinë e OKB-së, ajo mbrojti agresionin ushtarak të Rusisë, akuzoi Ukrainën për nazizëm dhe ftoi të pranishmit të vizitonin Donbasin për të parë “krimet e regjimit të Kievit”.

Këto deklarata nxitën reagime të menjëhershme nga disa delegacione evropiane, të cilat u larguan nga salla në shenjë proteste.

Ministria e Jashtme e Zvicrës sqaroi se sanksionet ndaj Matviyenkos nuk janë pezulluar, por asaj i është lejuar hyrja në territorin zviceran për pjesëmarrje në samit. Ndërkohë, sipas burimeve të Bloomberg, Italia dhe Franca kanë lejuar fluturimin e avionit që transportonte delegacionin rus në hapësirat e tyre ajrore, pas kërkesës së autoriteteve zvicerane.