Autoritetet ruse kanë ndërmarrë masa të reja për të forcuar kontrollin mbi internetin dhe komunikimet online, duke bllokuar qasjen në Snapchat dhe duke vendosur kufizime në shërbimin e video-thirrjeve FaceTime të Apple.

Rregullatori shtetëror i internetit, Roskomnadzor, ka deklaruar se këto platforma po përdoren për organizimin dhe realizimin e aktiviteteve terroriste në territorin rus, si dhe për rekrutimin e individëve për mashtrime dhe krime të tjera.

Sipas autoriteteve, veprimet kundër Snapchat janë ndërmarrë që më 10 tetor, por u bënë publike vetëm të enjten. Këto masa vijnë pas kufizimeve të vendosura më herët ndaj platformave të tjera të mëdha si YouTube, WhatsApp, Instagram dhe Telegram, të cilat janë rregullisht nën shënjestër që nga pushtimi i Ukrainës në vitin 2022.

Nën udhëheqjen e Vladimir Putinit, Rusia ka intensifikuar përpjekjet për të kontrolluar hapësirën digjitale, duke miratuar ligje kufizuese dhe duke bllokuar platformat që nuk i përshtaten kërkesave të autoriteteve. Qasja në YouTube u ndërpre vitin e kaluar, një veprim që ekspertët e vlerësuan si të qëllimshëm, ndërsa Kremlini akuzoi kompaninë Google për mosmirëmbajtje të pajisjeve të saj në vend.

Gjithashtu, këtë javë qeveria ruse ka bllokuar edhe platformën e njohur të lojërave Roblox, me arsyetimin se ky vendim synon mbrojtjen e fëmijëve nga përmbajtja e paligjshme dhe rreziku nga pedofilët që kontaktojnë të mitur përmes bisedave të lojës.