Gjatë muajit dhjetor të vitit të kaluar janë regjistruar gjithsej 1 mijë ndërmarrje të reja, duke shënuar rritje të dukshme të aktivitetit ekonomik në vend. Krahasuar me muajin paraprak, numri i ndërmarrjeve të reja është rritur për 8.8 për qind, ndërsa në raport me dhjetorin e vitit të kaluar vërehet një rritje prej 6 për qind.

Sipas të dhënave, aktivitetet ekonomike më të preferuara gjatë këtij muaji kanë qenë tregtia me shumicë dhe pakicë, përfshirë riparimin e mjeteve motorike dhe motoçikletave, me 252 ndërmarrje ose 25.2 për qind të totalit. Pasojnë aktivitetet profesionale, shkencore dhe teknike me 120 ndërmarrje (12%), akomodimi dhe shërbimet ushqimore me 110 ndërmarrje (11%), si dhe sektori i prodhimit me 99 ndërmarrje (9.9%).

Sa i përket madhësisë së ndërmarrjeve, pjesa dërrmuese i përket kategorisë së mikro-ndërmarrjeve me 0 deri në 9 të punësuar, gjithsej 988 të tilla. Ndërkaq, në kategorinë e ndërmarrjeve të vogla (10–49 të punësuar) janë regjistruar 12 ndërmarrje, ndërsa gjatë dhjetorit nuk është regjistruar asnjë ndërmarrje e mesme apo e madhe.

Në aspektin gjeografik, Regjioni i Prishtinës kryeson me 500 ndërmarrje të regjistruara, që përbën 50 për qind të totalit. Më pas renditen Regjioni i Prizrenit me 105 ndërmarrje (10.5%), Gjilani me 99 (9.9%), Ferizaj me 87 (8.7%), Mitrovica me 85 (8.5%), Gjakova me 65 (6.5%) dhe Peja me 59 ndërmarrje (5.9%).

Megjithatë, krahas rritjes së regjistrimeve të reja, gjatë dhjetorit janë shënuar edhe shuarje të ndërmarrjeve. Sipas të dhënave të Agjencisë së Statistikave të Kosovës (ASK), gjatë këtij muaji janë shuar gjithsej 135 ndërmarrje.