Gjatë vitit 2025, rreth 100 mijë pacientë kanë marrë trajtim në Klinikën Emergjente të Qendrës Klinike Universitare të Kosovës, duke shënuar rritje krahasuar me vitin 2024.

Drejtori i Klinikës Emergjente, Naser Syla, ka theksuar se ngarkesa e madhe vjen si pasojë e numrit të lartë të pacientëve dhe natyrës së rëndë të rasteve që trajtohen çdo ditë. Ai ka ngritur shqetësimin për mungesën e specialistëve të mjekësisë emergjente dhe interesimin e ulët për këtë fushë, duke paralajmëruar rrezik për të ardhmen.

Sipas të dhënave, deri në mesin e dhjetorit janë trajtuar 99,017 pacientë, rreth 4 mijë më shumë se një vit më parë. Aktualisht, klinika ka 23 specialistë dhe 68 infermierë.

Syla ka theksuar se një pjesë e madhe e pacientëve mund të trajtohen në nivelet tjera shëndetësore, ndërsa ka kërkuar ndërtimin e një objekti të ri për përmirësimin e kapaciteteve dhe shërbimeve në Klinikën Emergjente.