Barcelona u largua e pakënaqur nga ndeshja ndaj Real Sociedadit, kryesisht për shkak të vendimeve të arbitrit Gil Manzano dhe ndërhyrjeve të VAR-it. Pakënaqësia në kampin blaugrana ishte e dukshme edhe pas ndeshjes, fillimisht nga Frenkie de Jong dhe më pas nga trajneri Hansi Flick.

Zërave kritikë iu bashkua edhe mesfushori Fermín López, i cili reagoi në rrjetet sociale ndaj golit të anuluar të Lamine Yamal për pozicion jashtë loje. Fermín publikoi në Instagram një fotografi të pamjes së VAR-it të shfaqur gjatë transmetimit televiziv, të shoqëruar me disa emoji duke qeshur, duke ironizuar vendimin e marrë.

Në pamjen e ndarë nga lojtari i Barcelonës nuk vërehej qartë se këmba e Lamine Yamal ishte më përpara se ajo e mbrojtësit të Real Sociedadit, çka e bëri situatën edhe më polemike.

Përveç reagimit ironik, Fermín dërgoi edhe një mesazh uniteti pas humbjes në San Sebastian, duke shkruar: “Krenar për ekipin tim, nuk do të na mposhtin”.