Pesë persona janë arrestuar gjatë një operacioni të Policisë së Kosovës, të zhvilluar sot në komunat Shtime, Lipjan dhe Drenas, pas dyshimeve për veprimtari të kundërligjshme me armë.

Operacioni, i realizuar nga Drejtoria për Hetimin e Krimit të Organizuar dhe Krimeve të Rënda në bashkëpunim me prokurorinë kompetente, u krye pas zhvillimit të hetimeve dhe rezultoi me kontrollin e pesë lokacioneve të ndryshme. Gjatë bastisjeve u sekuestruan dëshmi materiale, përfshirë një AK-47, një pushkë të gjatë me dylbi, një pushkë gjuetie, një revole, 116 fishekë të kalibrave të ndryshëm, 8 fishekë me gaz, 2 pushkë ajrore dhe 5 telefona.

Sipas autoriteteve, të arrestuarit dyshohen për veprat penale “Importi, eksporti, furnizimi, transportimi, prodhimi, këmbimi, ndërmjetësimi ose shitja e paautorizuar e armëve apo materieve plasëse” dhe “Mbajtja në pronësi, kontroll ose posedim të paautorizuar të armëve”.

Pas intervistimit, me vendim të prokurorit, të dyshuarit janë dërguar në mbajtje për 48 orë.