Komisioni Qendror i Zgjedhjeve (KQZ) ka njoftuar se më 5 janar 2026 është përmbyllur procesi i tërheqjes së pakove me fletëvotime për votimin me postë jashtë Kosovës. Fillimisht, më 23 dhe 29 dhjetor 2025, nga kutitë postare të KQZ-së në Berlin dhe Bernë janë tërhequr 28,555 pako, prej të cilave 27,600 janë aprovuar dhe 955 janë refuzuar për shkak të mungesës së dëftesës së regjistrimit të votuesit.

Numërimi i fletëvotimeve ka filluar më 3 janar 2026 dhe pritet të përfundojë më 5 janar 2026. Më 2 janar 2026, janë tërhequr gjithsej 8,180 pako nga kutitë postare në qytete të ndryshme si Pragë, Londër, Paris, Zagreb, Stokholm, Stamboll, New York, Kanbera dhe Kopenhagë. Të gjitha këto paketa janë sjellë në Kosovë për t’u numëruar.

Në total, 58,000 shtetas të Kosovës ishin regjistruar për të votuar me postë në zgjedhjet e parakohshme për Kuvendin e Kosovës të mbajtura më 28 dhjetor 2025. Pas vlerësimit të pakove të tërhequra më 2 dhe 5 janar 2026, ato që do të aprovohen do të numërohen në Qendrën e Numërimit dhe Rezultateve (QNR).