Policia e Kosovës ka zhvilluar sot një operacion të suksesshëm antidrogë në Prishtinë, duke arrestuar gjashtë persona të dyshuar për përfshirje në shit-blerje të narkotikëve dhe duke sekuestruar sasi të konsiderueshme të kokainës.

Operacioni “Lugu”, i realizuar nga Drejtoria për Hetimin e Trafikimit me Narkotikë në Prishtinë me mbështetje nga njësi të tjera të sigurisë, u zhvillua më 6 gusht 2025, rreth orës 12:00, nën autorizimin e Prokurorisë Themelore dhe me urdhër të Gjykatës në Prishtinë.

Gjatë kontrollit në tetë lokacione të ndryshme (banesa, shtëpi dhe objekte përcjellëse), përfshirë edhe mbylljen e një lokali (“free shop”), policia ka sekuestruar:

300 gramë kokainë (me vlerë rreth 18,000 euro), 13,294 euro para të gatshme, 5 vetura me targa vendore, 2 pajisje DVR, dhe prova të tjera materiale të ndërlidhura me rastin.

Operacioni u mbështet nga Njësia Speciale Operative, Drejtoria e Teknikës Kriminalistike, njësia K9 dhe njësi patrulluese nga rajoni i Prishtinës.

Të dyshuarit janë shoqëruar për intervistim në prani të avokatëve dhe me vendim të prokurorit janë ndaluar për 48 orë. Policia e Kosovës thekson përkushtimin e saj për të luftuar shpërndarjen e narkotikëve në vend.