Mbi 100 milionë njerëz në mbarë botën përdorin cigare elektronike, sipas një raporti të ri të Organizatës Botërore të Shëndetësisë (OBSH). Edhe pse numri i duhanpirësve ka rënë me rreth 200 milionë në 25 vitet e fundit, “epidemia e duhanit mbetet larg përfundimit”, tha Drejtori i Përgjithshëm i OBSH-së, Tedros Adhanom Ghebreyesus.

Në vitin 2024, 1.2 miliardë njerëz ende pinin duhan, ndërsa kompanitë e duhanit po synojnë të rinjtë me produkte të reja nikotine. OBSH paralajmëron se bota nuk do ta arrijë objektivin për uljen me 30% të pirjes së duhanit deri në vitin 2025.

Sipas raportit, cigaret elektronike përdoren nga 86 milionë të rritur dhe 15 milionë adoleshentë, kryesisht në vendet e pasura. OBSH thotë se këto produkte nuk ndihmojnë në uljen e konsumit të duhanit dhe disa vende i kanë ndaluar.

Numri i grave duhanpirëse ka rënë ndjeshëm, ndërsa burrat mbeten shumica e duhanpirësve. Evropa ka përqindjen më të lartë të konsumit, ndërsa Afrika më të ulëtën. OBSH kërkon masa më të ashpra ndaj industrisë së duhanit, përfshirë ndalimin e reklamave dhe rritjen e taksave.