Gjykata Themelore në Prishtinë ka njoftuar se më 22 dhjetor do të mbahet seanca e shqyrtimit fillestar ndaj tre të pandehurve të akuzuar për krime lufte kundër popullsisë civile në Kosovë.

Të akuzuarit D. G., Z. S. dhe Z. C. përballen me aktakuzë të ngritur nga Prokuroria Speciale e Republikës së Kosovës më 30 dhjetor 2024, për veprën penale “krime lufte kundër popullsisë civile”, sipas nenit 142 lidhur me nenin 22 të Ligjit Penal të ish-RSFJ-së.

Gjykimi do të zhvillohet në mungesë, pasi të pandehurit janë të paarritshëm që nga ngritja e aktakuzës. Gjykata u ka bërë thirrje të pandehurve që të dorëzohen para autoriteteve të drejtësisë së Kosovës, ndërsa qytetarët që posedojnë informacione për vendndodhjen e tyre ftohen t’i raportojnë tek Policia e Kosovës ose organet kompetente.

Seanca do të mbahet në Pallatin e Drejtësisë në Hajvali, Objekti D, Kati I, Salla nr. 27, me fillim nga ora 13:15, dhe do të udhëhiqet nga kryetari i trupit gjykues, Leon Përlaska.