Kosova vazhdon të mos shfrytëzojë mbi një miliard euro fonde ndërkombëtare, për shkak të mungesës së ratifikimit të marrëveshjeve përkatëse në Kuvend. Këto mjete janë bllokuar për më shumë se një vit dhe miratimi i tyre varet nga vota e deputetëve.

Bëhet fjalë për rreth 882 milionë euro nga Plani për Reforma dhe Rritje i Bashkimit Evropian, si dhe mbi 120 milionë euro nga tri marrëveshje me Asociacionin Ndërkombëtar për Zhvillim të Bankës Botërore. Marrëveshjet kanë mbërritur në Kuvend në fund të vitit 2024, por nuk janë ratifikuar deri më tani.

Pavarësisht se zgjedhjet e parakohshme të 28 dhjetorit krijuan kushte për formimin e institucioneve të reja me shumicë të thjeshtë, miratimi i marrëveshjeve ndërkombëtare kërkon të paktën 80 vota. Në të njëjtën kohë, dështimi eventual për zgjedhjen e presidentit mund ta çojë vendin drejt zgjedhjeve të reja në pranverë.

Lëvizja Vetëvendosje, si fituese e zgjedhjeve, shpreh pritjen që opozita të bashkëpunojë për zhbllokimin e fondeve. Ish-nënkryetarja e Kuvendit, Albulena Haxhiu, ka theksuar se votimi i marrëveshjeve nuk duhet të kushtëzohet me procesin e zgjedhjes së presidentit.

Nga Lidhja Demokratike e Kosovës kanë deklaruar se do t’i mbështesin marrëveshjet që janë në interes të vendit, ndërsa PDK dhe AAK nuk kanë dhënë qëndrim zyrtar. Megjithatë, kryetari i PDK-së, Bedri Hamza, ka sinjalizuar se partia e tij do të votojë çdo marrëveshje që i shërben Kosovës.

Ekspertët paralajmërojnë se vonesat po e dëmtojnë Kosovën, pasi fondet e BE-së janë të vlefshme deri në vitin 2027, ndërsa disa marrëveshje me Bankën Botërore kanë afat hyrjeje në fuqi deri më 13 shkurt 2026.

Nëse Kuvendi nuk vepron shpejt, ekziston rreziku real që Kosova të humbasë miliona euro ndihmë dhe investime të huaja, në një moment kritik për zhvillimin ekonomik dhe reformat shtetërore.