Lando Norris është shpallur kampion i botës në Formula 1 pas një gare emocionuese në Abu Dhabi, ku ai mbylli sezonin me një paraqitje mbresëlënëse në vendin e tretë. Kjo mjaftoi për të siguruar titullin e tij të parë, duke u bërë britaniku i 11-të që arrin këtë arritje.

Norris kishte nevojë vetëm për të përfunduar në top-treshen e garës në pistën Yas Marina për të fituar titullin, dhe ai e realizoi këtë, pavarësisht një hetimi nga komisarët e garës për kalimin jashtë pistës kur kaloi Yuki Tsunodën, shokun e skuadrës së Max Verstappen te Red Bull. Pas hetimit, Norris shpëtoi pa asnjë ndëshkim.

Max Verstappen fitoi garën nga pozita e “pole position” dhe mbylli sezonin me më shumë fitore se çdo pilot tjetër, por kjo nuk ishte e mjaftueshme për të ndaluar Norrisin në rrugën drejt titullit. Verstappen kaloi vijën e finishit 12.5 sekonda para Oscar Piastrit, ndërsa Norris ishte 3.9 sekonda pas shokut të skuadrës dhe 6.7 sekonda para Charles Leclerc, që mbylli garën në vendin e katërt.

Gjatë garës, Norris nuk u lëkund nga nisja agresive e Verstappenit, i cili e ktheu makinën majtas për të prerë rrugën rivalit të tij. Verstappen udhëhoqi garën, ndërsa Norris qëndroi i dyti dhe Piastri i treti. Megjithatë, Norris humbi një pozitë në xhiron e parë, kur Piastri e kaloi nga ana e jashtme në kthesën e nëntë.

Pjesa më e vështirë e garës për Norrisin erdhi më pas, kur Yuki Tsunoda u përdor nga Red Bull për t’i prishur ritmin britanikut. Në radio, komandat për Tsunodën ishin të qarta: “Nëse të kap, bëj maksimumin.” Tsunoda u përgjigj: “E di çfarë duhet të bëj, lëreni mua.”

Ky moment solli kujtime nga finalen e vitit 2021, kur Sergio Perez u bë i njohur si “Ministri i Mbrojtjes së Meksikës”, duke mbajtur pas Lewis Hamiltonin për disa xhiro. Megjithatë, në fund, Lando Norris ia doli të siguronte vendin e tretë dhe të shpallej kampion i botës për herë të parë.