Liverpool ka reaguar pas deklaratave bombastike të Mohamed Salahut, i cili ka shprehur pakënaqësi për marrëdhënien e tij me trajnerin Arne Slot dhe trajtimin që ka marrë gjatë periudhës së fundit. Pas barazimit dramatik 3-3 me Leeds United, ku kampanja e Liverpoolit në Premierligë përkeqësohet, Salah tha se është ndier i lënë jashtë dhe se marrëdhënia e tij me trajnerin është prishur.

Në një intervistë të fortë, ylli egjiptian deklaroi se ndihet si të jetë “hedhur nën autobus” nga klubi dhe se nuk e kupton pse ka ndodhur kjo. “Kam pasur gjithmonë një marrëdhënie të mirë me trajnerin, por papritur nuk kemi më asnjë marrëdhënie. Kështu ndihem, sikur nuk më duan më këtu,” tha ai, duke shtuar se ka bërë shumë për klubin dhe nuk e kupton arsyen e trajtimit të tij.

Pas këtyre deklaratave, “BBC Sport” ka raportuar se Liverpooli është i hapur për të shqyrtuar të ardhmen e Salahut, me disa klube të Saudi Pro League që kanë shprehur interes për transferimin e tij. Salah konfirmoi se kishte pasur bisedime me klubet saudite para nënshkrimit të kontratës së tij të fundit me Liverpoolin, duke zbuluar se Arabia Saudite mund të kishte qenë destinacioni i tij nëse nuk do të kishte vazhduar qëndrimin në “Anfield”.

Al-Hilal, klubi aktual i Darwin Núñez, është emri që është përmendur si favorit për të nënshkruar me Salah, megjithatë ende nuk ka filluar ndonjë bisedë formale.

Mohamed Salah ka qenë një nga lojtarët më të rëndësishëm të Liverpoolit që nga ardhja e tij në vitin 2017, duke shënuar 250 gola në 420 paraqitje. Megjithatë, këtë sezon ka pasur vështirësi, duke shënuar vetëm katër gola dhe dhënë dy asistime në 13 ndeshje të Premierligës. Tensionet aktuale janë një moment kritik për Salah dhe Liverpoolin, pasi sulmuesi gjithashtu do të humbasë një pjesë të sezonit 2025/26 për t’u përfaqësuar me Egjiptin në Kupën e Kombeve të Afrikës që nis më 15 dhjetor.