Republika Sërpska është përfshirë nga krizë politike pasi kryeministri Radovan Vishkoviq dha dorëheqje më 18 gusht, ndërsa Millorad Dodikut iu hoq mandati i presidentit pas një vendimi gjyqësor që i ndalon mbajtjen e posteve publike për gjashtë vjet.

Sipas Kushtetutës, vetëm presidenti mund të propozojë mandatar për qeverinë e re. Deri në zgjedhjet e parakohshme presidenciale, që duhet të mbahen brenda 90 ditësh, qeveria aktuale do të ketë mandat teknik.

Ekspertët e së drejtës kushtetuese paralajmërojnë se çdo përpjekje e Dodikut për të emëruar kryeministër do të ishte jokushtetuese, ndërsa analistët politikë e shohin dorëheqjen e Vishkoviqit si pjesë të strategjisë së Dodikut për të forcuar pushtetin dhe për të sfiduar institucionet shtetërore, duke përfshirë edhe paralajmërimin e një referendumi në shtator.