Anëtarësimi në NATO mbetet prioritet strategjik për Kosovën, në një kohë kur rreziqet e sigurisë në Evropë janë në rritje. Autoritetet theksojnë se rruga drejt këtij objektivi varet edhe nga zhvillimet gjeopolitike, ndërsa ende nuk ka konfirmim për një aplikim formal.

Qeveria në detyrë nënvizon rritjen e investimeve në mbrojtje dhe avancimin e statusit të Kosovës në Asamblenë Parlamentare të NATO-s, si dhe pjesëmarrjen në ushtrime të përbashkëta ushtarake. Megjithatë, Kosova mbetet jashtë Partneritetit për Paqe, për shkak të pengesave politike dhe mosnjohjes nga disa vende anëtare.

Presidentja Vjosa Osmani dhe ekspertë të sigurisë vlerësojnë se anëtarësimi i Kosovës do të forconte stabilitetin rajonal. Ata theksojnë nevojën për unitet politik, reforma të brendshme dhe thellim të bashkëpunimit me aleatët perëndimorë dhe vendet e NATO-s në rajon, si hapa kyç drejt afrimit me Aleancën.