Gjatë këtij viti, në Kosovë janë importuar gjithsej 351 mijë kilogramë fishekzjarre, me një vlerë të përgjithshme prej rreth 800 mijë euro. Këtë e ka bërë të ditur zëdhënësi i Doganës së Kosovës, Adriatik Stavileci, duke u bazuar në të dhënat zyrtare doganore.

Sipas tij, niveli i lartë i importit tregon një rritje të dukshme të kërkesës në treg, veçanërisht në periudhën e fundvitit, kur përdorimi i fishekzjarrëve shtohet për shkak të festave dhe aktiviteteve publike e private.

Ndërkohë, institucionet e sigurisë kanë apeluar te qytetarët që të shmangin përdorimin e fishekzjarrëve pa leje, duke theksuar se ato paraqesin rrezik për sigurinë publike, sidomos për fëmijët dhe të moshuarit. Qytetarët janë ftuar të respektojnë rregullat ligjore dhe udhëzimet përkatëse.