Kryetari i Aleancës për Ardhmërinë e Kosovës, Ramush Haradinaj, ka reaguar pas përmbytjeve që kanë përfshirë vendin, duke vlerësuar se dëmet janë të mëdha dhe se situata kërkon reagim të menjëhershëm nga institucionet shtetërore.

Haradinaj ka theksuar se përmbytjet kanë prekur rëndë shtëpi, biznese dhe ekonomi familjare në mbarë Kosovën, duke theksuar se kjo gjendje nuk mund të neglizhohet. Ai ka kërkuar vlerësim urgjent të dëmeve dhe ndihmë të drejtpërdrejtë për familjet e prekura.

Sipas tij, fondet emergjente duhet të ndahen pa vonesë, ndërsa buxheti i vitit 2026 duhet të rishikohet për të reflektuar pasojat e kësaj fatkeqësie natyrore. Haradinaj ka nënvizuar se mbështetja e shtetit duhet të jetë e menjëhershme dhe të vazhdojë gjatë gjithë vitit të ardhshëm.

Ai ka bërë thirrje për rritje të gatishmërisë institucionale dhe prani më të madhe në terren, duke theksuar rëndësinë e solidaritetit dhe përgjegjësisë në menaxhimin e situatës emergjente. Po ashtu, Haradinaj ka shprehur mbështetje për zjarrfikësit, Policinë e Kosovës dhe shtabet emergjente, të cilët janë të angazhuar drejtpërdrejt në ndihmë të qytetarëve të prekur.