Një i mitur 14-vjeçar është ndaluar nga Policia e Kosovës në Ferizaj pasi u kap në posedim të një arme zjarri pa fishek dhe një spreji.

Ngjarja ndodhi në orët e para të mëngjesit të sotëm, më 19 korrik 2025, rreth orës 00:10. Policia e stacionit në Ferizaj kishte marrë informacion se një person po mbante armë zjarri me vete. Pas reagimit të shpejtë, njësitë policore arritën ta ndalonin të dyshuarin dhe, gjatë kontrollit, gjetën dhe sekuestruan armën dhe sprejin në fjalë.

I mituri u shoqërua në stacionin policor nga njësia e hetimeve dhe u intervistua në prani të prindit dhe avokatit mbrojtës të caktuar sipas detyrës zyrtare. Me urdhër të prokurorit kujdestar për të mitur, ai u lirua në procedurë të rregullt, ndërsa armët janë konfiskuar.

Policia Rajonale e Ferizajt ka ritheksuar përkushtimin për të luftuar mbajtjen e paligjshme të armëve dhe ka bërë thirrje për bashkëpunim nga qytetarët në raportimin e rasteve të tilla. Njëkohësisht, u bën thirrje prindërve dhe kujdestarëve që të kenë kujdes të shtuar ndaj fëmijëve, duke i edukuar për të qëndruar larg armëve dhe mjeteve të rrezikshme, pasi përfshirja e të miturve në raste të tilla paraqet rrezik serioz për jetën e tyre dhe të të tjerëve.