Mesfushori spanjoll Fabián Ruiz është shumë pranë rinovimit të kontratës me Paris Saint-Germain, pavarësisht thashethemeve që e lidhnin me Turqinë. Ai është bërë një nga lojtarët kyç të skuadrës dhe një preferencë e trajnerit Luis Enrique.

Fabián, i cili u transferua te PSG në vitin 2022 nga Betisi, ka zhvilluar një sezon të shkëlqyer nën drejtimin e Luis Enrique dhe tani pritet të nënshkruajë një kontratë dyvjeçare, që do ta mbajë te klubi deri në vitin 2029. Pavarësisht interesit të Galatasaray dhe ofertave të tjera, mesfushori ka zgjedhur të qëndrojë në Paris.

Luis Enrique ka qenë një nga mbështetësit më të mëdhenj të Fabián, duke theksuar rëndësinë e tij në mesfushë dhe ndikimin e tij në arritjen e gjashtë titujve të PSG-së në vitin 2025. Eurokupa e fituar me Spanjën në 2024 konfirmoi edhe më tej vlerën e tij si lojtar.

Trajneri spanjoll ka deklaruar se një nga gabimet më të mëdha të karrierës së tij ishte mosfutja e Fabián në listën e Kombëtares për Botërorin 2022. Sot, ai është bërë një pjesë e pazëvendësueshme e skuadrës dhe një nga lojtarët më të vlerësuar nga tifozët.

“Fabián bën shumë gjëra që gazetarët nuk mund t’i shohin. Është fantastike të kesh një lojtar të tillë në mesfushë,” tha Luis Enrique duke përshkruar kontributin e tij te PSG-ja.