Eksperti i sigurisë Drizan Shala ka vlerësuar se arrestimet e fundit të qytetarëve të Kosovës në Serbi përbëjnë një strategji politike dhe psikologjike të Beogradit. Ai ka theksuar se çdo ide për mbylljen e kufirit Kosovë–Serbi nuk është logjike dhe mund të shkaktojë pasoja të rënda ekonomike për vendin.

Në një intervistë për Ekonomia Online, Shala ka sqaruar se arrestimet synojnë të dërgojnë mesazhe politike dhe të frikësojnë qytetarët që kanë lidhje të kaluara me Ushtrinë Çlirimtare të Kosovës apo strukturat e sigurisë pasluftës. Ai ka paralajmëruar se veprime të pamenduara mund të dëmtojnë pozicionin ndërkombëtar të Kosovës dhe të shfrytëzohen nga Serbia për legjitimizim ndërkombëtar.

Shala ka përmendur gjithashtu bashkërendimin e BIA-s dhe Policisë Kufitare të Serbisë, duke nënvizuar se qytetarët e Kosovës mund të jenë objekt i ndalimeve apo presionit psikologjik, ndërsa çdo ndërprerje e korridoreve tranzitore do të rritte çmimet dhe do të rëndonte jetesën e qytetarëve.

Në anën tjetër, avokati Arianit Koci ka sugjeruar mbylljen e përkohshme të kufirit me Serbinë si masë mbrojtëse për qytetarët, duke argumentuar se arrestimet selektive dhe presioni politik e cenojnë sigurinë e qytetarëve të Kosovës dhe se shteti ka të drejtë të ndërmarrë masa të përkohshme për mbrojtjen e tyre.