Disa nxënës të një shkolle në fshatin Vitomiricë të Pejës dyshohet se janë helmuar gjatë procesit mësimor. Lajmi është konfirmuar nga zëdhënësi i Policisë për rajonin e Pejës, Fadil Gashi, i cili tha se bëhet fjalë për 6 deri në 7 nxënës.

Sipas tij, drejtoria e shkollës është njoftuar rreth orës 10:00 të mëngjesit se disa nxënës kishin shfaqur shqetësime shëndetësore. Të njëjtit janë transportuar me autoambulancë në Qendrën e Mjekësisë Familjare në afërsi, ku kanë marrë trajtim mjekësor dhe më pas janë liruar në shtëpi.

Me urdhër të prokurorit, drejtori i shkollës është ftuar për intervistim dhe ka dhënë deklaratën e tij lidhur me rastin. Hetimet po vazhdojnë nga njësitet përkatëse të Policisë për të zbardhur shkaqet e dyshimit për helmim.