Dollari amerikan po vijon rënien ndaj monedhave kryesore ndërkombëtare, duke reflektuar tendencën negative të nisur në vitin 2025. Vetëm vitin e kaluar, monedha e SHBA-së regjistroi humbjen më të madhe vjetore që nga gati një dekadë më parë, ndërsa gjatë vitit 2025 u zhvlerësua rreth 10 për qind kundrejt një shporte monedhash. Që nga fillimi i vitit 2026, rënia ka vazhduar me rreth 2,6 për qind të tjera.

Si pasojë e kësaj lëvizjeje, euroja ka arritur për herë të parë që nga viti 2021 nivelin 1,20 dollarë amerikanë. Edhe funta britanike dhe yeni japonez janë forcuar, duke u këmbyer me dollarin në nivelet më të larta të viteve të fundit.

Sipas analistëve, zhvlerësimi i vazhdueshëm i dollarit lidhet me rënien e besimit të investitorëve, të nxitur nga pasiguria rreth politikave ekonomike të presidentit amerikan Donald Trump. Një tjetër interpretim sugjeron se një dollar më i dobët është i dëshiruar nga vetë administrata amerikane, pasi do t’i bënte eksportet e SHBA-së më konkurruese në tregjet ndërkombëtare. Vetë Trump ka deklaruar se nuk e sheh si problem dobësimin e monedhës amerikane.

Në këtë kontekst, Stephen Miran, ish-këshilltar ekonomik i Trumpit dhe aktualisht anëtar i bordit të Rezervës Federale, ka argumentuar se tarifat doganore dhe zhvlerësimi i dollarit janë mjete për uljen e deficitit tregtar të SHBA-së.

Forcimi i euros ka ndikime të drejtpërdrejta edhe në ekonominë evropiane. Gjatë vitit 2025, euroja është rritur rreth 13 për qind ndaj dollarit, rritja më e fortë që nga viti 2017. Sipas ekonomistëve, një euro më e fortë dëmton konkurrueshmërinë e eksporteve evropiane, por nga ana tjetër ul koston e importeve dhe çmimet për konsumatorët.

Ekspertët paralajmërojnë se nëse euroja vazhdon të forcohet, rritja ekonomike në eurozonë mund të ndikohet negativisht. Megjithatë, mendimet mbeten të ndara lidhur me nevojën për ndërhyrje të Bankës Qendrore Evropiane. Disa zyrtarë e konsiderojnë rritjen aktuale të euros si të moderuar, ndërsa të tjerë vlerësojnë se luhatjet e kursit të këmbimit janë të përballueshme dhe nuk kërkojnë masa të menjëhershme.

Për momentin, BQE po ndjek nga afër zhvillimet, ndërsa çdo vendim për ndërhyrje apo ndryshim të normave të interesit pritet të varet nga ecuria e mëtejshme e kursit euro–dollar dhe ndikimi i tij në ekonominë e eurozonës.