Përpjekja e 50-të për konstituimin e Kuvendit të Kosovës ka dështuar sërish, duke thelluar krizën institucionale dhe vënë në pikëpyetje respektimin e afatit kushtetues për formimin e institucioneve pas zgjedhjeve.

Kryesuesi i seancës, Avni Dehari, njoftoi se mbledhja e radhës do të mbahet të mërkurën në orën 11:00. Megjithatë, pengesa kryesore mbetet mungesa e marrëveshjes për krijimin e komisionit që do të organizonte votimin e fshehtë për kryetarin e Kuvendit.

Partitë opozitare – PDK, LDK, Lista Serbe, AAK dhe Nisma – vazhdojnë të kundërshtojnë përfshirjen në këtë komision, ndërsa Lëvizja Vetëvendosje insiston në kandidaturën e Albulena Haxhiut dhe në procedurën e votimit të fshehtë.

Në seancën e sotme ishin të pranishëm 104 deputetë, por vetëm 53 prej tyre votuan pro formimit të komisionit, duke pamundësuar përparimin në proces.

Kjo bllokadë ndodh në prag të përfundimit të afatit kushtetues 30-ditor, i përcaktuar nga vendimi i Gjykatës Kushtetuese në rastin KO124/25, që kërkon konstituimin e Kuvendit deri më 26 korrik 2025.