Fermin Lopez po përjeton një sezon të jashtëzakonshëm me Barcelonën, duke u shndërruar në një nga zbulimet më të mëdha të ekipit katalanas. Mesfushori 22-vjeçar ka siguruar një vend të rregullt në formacionin e parë dhe ka dhënë kontribut të madh me tetë gola dhe tetë asistime në 20 paraqitje në të gjitha garat.

Nën drejtimin e Hansi Flick, Fermin është kthyer në një pjesë të rëndësishme të projektit sportiv të Barcelonës, falë intensitetit, energjisë dhe ndikimit të tij të drejtpërdrejtë në lojë. Performancat e tij nuk kanë kaluar pa u vënë re, sidomos nga klubet e Ligës Premier.

Sipas mediave angleze, interesimi më serioz vjen nga Chelsea, i cili është i gatshëm të paraqesë një ofertë rreth 150 milionë euro për mesfushorin spanjoll. Një shumë e tillë do të ishte ndër transferimet më të shtrenjta në historinë e Barcelonës dhe do ta vendoste klubin përballë një dileme, duke marrë parasysh edhe gjendjen financiare.

Megjithëse Fermin Lopez mbetet i fokusuar te Barcelona dhe nuk ka shprehur dëshirë për largim, një ofertë e këtij niveli mund të ndryshojë situatën. Nëse Chelsea vendos të konkretizojë interesimin, mesfushori spanjoll mund të jetë një nga emrat më të bujshëm të merkatos së verës.