Transferimi rekord i Florian Wirtz nga Bayer Leverkusen te Liverpool, në vlerë prej 140 milionë eurosh, vazhdon të jetë një nga lëvizjet më të diskutuara të kohëve të fundit në futbollin gjerman. Megjithatë, përpara se ylli gjerman të zgjidhte Ligën Premier, kishte përpjekje që ai të mos përfundonte te rivali i madh, Bayern Munich.

Kapiteni i Leverkusenit, Robert Andrich, ka zbuluar në podcastin Playmaker të 360Media se e kishte këshilluar personalisht Wirtzin të mos transferohej te Bayerni, i cili në atë periudhë shihej si favoriti kryesor për nënshkrimin e tij.

Sipas Andrich, ai i kishte kërkuar bashkëlojtarit që të mos forconte rivalin direkt të Leverkusenit, duke theksuar se preferonte që Wirtz të vazhdonte karrierën jashtë Gjermanisë. Madje, Andrich ka treguar se këtë qëndrim ua kishte bërë të qartë edhe përfaqësuesve të Bayernit.

Në fund, dëshira e kapitenit të Leverkusenit u realizua. Pas disa muajsh negociatash, Wirtz vendosi të transferohej te Liverpool, ndërsa kontaktet me Bayern Munich mbetën minimale dhe u kufizuan në një takim të vetëm në fund të sezonit, kur lojtari tashmë e kishte marrë vendimin.

Sipas raportimeve, 22-vjeçari e konsideroi Ligën Premier si një sfidë më të madhe personale. Vendimi i tij për t’u larguar nga Gjermania erdhi pas një sezoni të suksesshëm me Leverkusenin, ku fitoi dy trofe në vitin 2024, dhe ishte befasues edhe për vetë Andrichin, i cili u shpreh i kënaqur për hapin e ri në karrierën e bashkëlojtarit të tij.