Kryetari i Lidhjes Demokratike të Kosovës, Lumir Abdixhiku, ka reaguar ndaj zhvillimeve të fundit brenda partisë, duke theksuar se më shumë se dorëheqja nuk ka çfarë të ofrojë. Përmes një postimi në Facebook, ai bëri të ditur se gjatë diskutimeve të gjata brenda LDK-së janë dëgjuar me vëmendje të gjitha kritikat dhe shqetësimet, ndërsa vendimet janë marrë me përgjegjësi dhe në përputhje me vullnetin e shumicës.

Abdixhiku tha se nuk i shmanget asnjë përgjegjësie dhe se ka ndërmarrë hapin më moral duke ofruar dorëheqjen e tij, duke hapur rrugë për këdo që ka pretendime për drejtimin e partisë. Ai theksoi se vendimi përfundimtar i takon Kuvendit të LDK-së dhe se çdo vendim që do të merret do ta respektojë me dinjitet dhe qetësi.

Në fund, ai bëri thirrje për debat të hapur dhe demokratik, pa drama dhe protagonizëm, duke nënvizuar se LDK është institucion dhe se mbi çdo emër qëndron partia.