Policia e Kosovës ka bërë të ditur se rreth orës 01:00 ka pranuar informacione se në një lokal në Skenderaj po zhvilloheshin lojëra fati të kundërligjshme.

Sipas njoftimit, njësitë policore kanë intervenuar menjëherë dhe gjatë kontrollit në lokal kanë hasur 14 persona, të cilët dyshohet se po merrnin pjesë në këto lojëra. Gjatë veprimeve policore është sekuestruar një tavolinë pokeri, si dhe pajisje të tjera që shërbenin për organizimin e bixhozit.

Si rezultat i hetimeve, pronari i lokalit është arrestuar, ndërsa personat e tjerë janë shoqëruar në stacion policor dhe janë intervistuar në cilësinë e dëshmitarëve.

Me vendim të prokurorit kujdestar, ndaj të dyshuarit është iniciuar rasti penal për veprën “Organizimi i skemave piramidale dhe bixhozit të paligjshëm”, ndërsa i njëjti është ndaluar në mbajtje policore.