Kosova vazhdon të funksionojë me dhjetëra pozita kyçe të udhëhequra nga ushtrues detyre, duke nisur nga Qeveria në detyrë prej gati një viti e deri te shumë institucione shtetërore.

Në Ministrinë e Financave, Punës dhe Transfereve, me ushtrues detyre janë disa pozita të rëndësishme, përfshirë Thesarin, Njësinë për Inteligjencë Financiare, Agjencinë Qendrore të Prokurimit dhe Inspektoratin Qendror të Punës. Edhe Ministria e Drejtësisë ka një sërë institucionesh të drejtuara nga ushtrues detyre, si Avokatura Shtetërore, Agjencia për Administrimin e Pasurisë së Sekuestruar, Agjencia për Ndihmë Juridike Falas dhe Instituti i Mjekësisë Ligjore.

Në Ministrinë e Punëve të Brendshme, me ushtrues detyre vazhdojnë të funksionojnë Akademia e Kosovës për Siguri Publike dhe Agjencia e Regjistrimit Civil, ndërsa situatë e ngjashme është edhe në ministri të tjera.

Për shkak të mosfunksionimit të Kuvendit, ka përfunduar mandati i Avokatit të Popullit dhe zëvendësve të tij, por ata vazhdojnë detyrën deri në emërime të reja. Jo funksionale për mungesë bordi mbeten edhe KPM-ja dhe Bordi i RTK-së.

Ndër pozitat më të rëndësishme me ushtrues detyre është ajo e Kryeprokurorit të Shtetit, procesi i emërimit të të cilit ka mbetur pezull. Po ashtu, Korporata Energjetike e Kosovës dhe KOSTT funksionojnë prej vitesh pa drejtues të rregullt.

Shoqëria civile ka kritikuar vazhdimisht institucionet, duke vlerësuar se po abuzohet me emërimet e ushtruesve të detyrës.