Policia e Kosovës ka arrestuar dy persona të dyshuar për dhunimin e një gruaje 30-vjeçare në Fushë Kosovë, ngjarje e raportuar më 31 dhjetor 2025. Viktima, A.H., dyshohet se u dërgua fillimisht në një motel, ku u dhunua seksualisht, dhe më pas u braktis në një zonë malore.

Pas denoncimit të rastit, Njësia për Hetimin e Krimeve të Rënda ndërmori veprime intensive hetimore. Më 1 janar 2026, në pikën kufitare Mutivodë u arrestua njëri nga të dyshuarit, L.S., rreth 40-vjeç, ndërsa u sigurua edhe prezenca e të dyshuarit tjetër, L.G., rreth 39-vjeç.

Me vendim të Prokurorit kujdestar, të dy janë ndaluar për 48 orë, ndërsa hetimet vazhdojnë për ndriçimin e plotë të rrethanave. Burimet e afërta me hetimin bëjnë të ditur se ndaj të dyshuarve priten veprime të mëtejshme procedurale, përfshirë kërkesën për paraburgim. Rasti trajtohet me prioritet të lartë nga organet e drejtësisë.