Presidenti amerikan, Donald Trump, njoftoi gjatë Ditës së Krishtlindjes se Shtetet e Bashkuara kanë kryer një seri sulmesh në Nigeri, të drejtuara kundër militantëve të Shtetit Islamik (ISIS) në veri të vendit. Vendimi vjen pas javësh akuzash nga Trump ndaj qeverisë nigeriane për mosveprim ndaj persekutimit të të krishterëve.

Në deklaratën e tij, Trump tha se sulmet kishin në shënjestër militantët që po sulmonin dhe vrisnin “në mënyrë brutale kryesisht të krishterë të pafajshëm”. Një zyrtar amerikan i Departamentit të Luftës bëri të ditur se operacionet u kryen në bashkëpunim me Nigerinë, duke përfshirë shkëmbim informacioni dhe koordinim strategjik.

Që nga fillimi i vitit, Trump kishte shpallur Nigerinë “vend me shqetësim të veçantë” për shkak të persekutimit të të krishterëve, duke i dhënë Pentagonit autorizimin për të planifikuar veprime ushtarake. Pjesë e politikës së tij ka qenë edhe mobilizimi i mbështetjes së krishterëve ungjillorë brenda SHBA-së.

Megjithatë, qeveria nigeriane ka theksuar se dhuna në vend nuk është drejtuar vetëm ndaj të krishterëve, por prek edhe myslimanët dhe komunitete të tjera, duke e cilësuar situatën si krizë sigurie të ndërlikuar që lidhet me konflikte mbi tokën, burimet dhe motive financiare, përveç dallimeve fetare.

Presidenti nigerian, Bola Ahmed Tinubu, ka deklaruar se paraqitja e vendit si një shtet që nuk respekton liritë fetare nuk pasqyron realitetin, duke theksuar se Nigeria mbetet një shtet laik me garanci kushtetuese për mbrojtjen e qytetarëve të të gjitha besimeve.