Bedri Hamza është zgjedhur kryetari i ri i Partisë Demokratike të Kosovës, duke marrë mbështetjen e delegatëve në Konventën e sotme të partisë. Pas votimit, ai ka shprehur mirënjohjen për besimin e dhënë dhe ka theksuar se drejtimin e ri e pranon me përkushtim të plotë.

Hamza u shpreh se PDK-ja mbetet “shtëpia e përbashkët” e anëtarëve dhe se Kosova ka nevojë për një parti të bashkuar, me vizion të qartë për të ardhmen. Ai premtoi hapje më të madhe ndaj qytetarëve, forcim të strukturave në të gjitha nivelet dhe rritje të përfshirjes së të rinjve në vendimmarrje.

Në fjalimin e tij, Hamza theksoi se partia do të vazhdojë rrugën përpara me përgjegjësi dhe vendosmëri. “Rruga përpara kërkon guxim dhe vendosmëri – dhe ne e kemi”, tha ai.

Kryetari i ri i PDK-së falënderoi anëtarësinë dhe strukturat e partisë për angazhimin e tyre dhe u zotua se do të japë maksimumin në shërbim të organizatës. “Vazhdojmë së bashku, drejt fitoreve të reja. Faleminderit delegatë, faleminderit PDK”, përmbylli Hamza.