Një përleshje fizike është regjistruar pas mesnate në lokalin “Bubble”, në rrugën “Sylejman Vokshi” në Prishtinë. Sipas burimeve të Gazetës Sinjali, incidenti ka ndodhur rreth orës 23:50 të datës 18 tetor 2025, kur një person në gjendje të dehur ka sulmuar një qytetar për shkak të orientimit të tij seksual.

I dyshuari, i identifikuar si Valon Murtezi, 31 vjeç, pas konsumimit të sasisë së konsiderueshme të alkoolit, është konfliktuar me një person të njohur me nofkën “Barbi”. Gjatë debatit verbal, Murtezi dyshohet se e ka ofenduar dhe më pas ka tentuar ta sulmojë fizikisht atë, duke shkaktuar reagimin e të pranishmëve në lokal.

Në përleshjen që pasoi, Murtezi ka pësuar lëndime të lehta trupore, ndërsa në vendngjarje kanë ndërhyrë njësitë policore. Ai është gjetur në gjendje të rëndë alkoolike – me nivel prej 0.76 mg/L – dhe është dërguar për trajtim në QKUK.

Me urdhër të Prokurorit Kujdestar, i dyshuari është ndaluar përkohësisht nga ora 01:30 deri në 09:00 të datës 19 tetor. Policia ka inicuar rastin si “Lëndim i lehtë trupor”, ndërsa hetimet po vazhdojnë për identifikimin e personave të tjerë të përfshirë dhe për sqarimin e plotë të rrethanave të ngjarjes.