Kryeministri Edi Rama ka njoftuar se Shqipëria do të hapë edhe katër kapituj të rinj të negociatave për anëtarësim në Bashkimin Evropian, me ftesë të Presidencës daneze të BE-së.

Sipas Ramës, kapitujt që do të hapen më 16 shtator lidhen me Agjendën e Gjelbër dhe Ndërlidhjen e Qëndrueshme, duke përfshirë fusha me rëndësi strategjike si transporti, energjia, rrjetet trans-evropiane dhe mjedisi.

Kreu i qeverisë theksoi se ky është një moment historik, pasi Shqipëria ka arritur të hapë 28 kapituj negociatash brenda vetëm 11 muajve – një ritëm që ai e cilësoi si rekord absolut në procesin e zgjerimit.

“Është vendosur një tjetër gur kilometrik në rrugën drejt synimit tonë për Shqipërinë në BE në vitin 2030”, deklaroi Rama.