Konstituimi i Kuvendit të Kosovës është bllokuar në pikën e zgjedhjes së nënkryetarit nga komuniteti serb. Pasi kandidati i Listës Serbe, Sllavko Simiq, dështoi tri herë të marrë 61 votat e nevojshme, kryekuvendari Dimal Basha vendosi të aplikojë shortin, duke përfshirë në garë edhe Nenad Rashiqin nga një tjetër parti serbe.

Juristët theksojnë se ky hap bie ndesh me Kushtetutën dhe me Rregulloren e Kuvendit, pasi sipas tyre kandidati duhet të ketë përkrahjen e shumicës së deputetëve serbë në Kuvend, çka Rashiq nuk e ka. Ndërkohë, Kushtetuta parasheh vetëm që nënkryetari të jetë nga radhët e deputetëve serbë, pa përmendur kriterin e mbështetjes së shumicës.

Pas dy raundeve votimi, asnjë kandidat nuk ka siguruar shumicën e nevojshme. Vetëvendosje e mbështeti Rashiqin, por votat e saj nuk mjaftuan. Ai ka edhe një shans tjetër përpara se procesi të konsiderohet i mbyllur.

Ekspertët paralajmërojnë se nëse asnjë kandidat nuk merr votat e kërkuara, Kuvendi mund të dështojë të konstituohet plotësisht, duke çuar vendin drejt një krize të re kushtetuese. Lista Serbe tashmë ka paralajmëruar se do t’i drejtohet Gjykatës Kushtetuese.

Juristi Ehat Miftaraj nga IKD thotë se “shorti dhe votimi aktual janë kundërkushtetues dhe çdo vendim i dalë nga kjo procedurë është i pavlefshëm”. Ai shton se çështja tashmë duket se do të përfundojë në Kushtetuese, për shkak të mungesës së vullnetit politik për të respektuar rregullat kushtetuese dhe parlamentare.