Prokuroria Speciale ka ngritur aktakuzë ndaj Faton Klinakut dhe Nuredin Selmanit për kanosje ndaj kryeministrit në detyrë, Albin Kurti. Të dy akuzohen se, përmes postimeve në rrjete sociale dhe deklaratave publike, kanë bërë kërcënime serioze ndaj Kurtit.

Klinaku ka pranuar autorësinë e postimeve, përfshirë shprehjen “më parë e vras Albin Kurtin sesa ia lëshoj rrugën”, por mohoi të ketë pasur qëllim kërcënues. Ai tha se reagimi i tij ishte pas provokimeve dhe se nuk ka ndërmend të kërcënojë askënd.

Selmani, ndërkaq, ka pranuar veprimet dhe ka shprehur pendesë, duke deklaruar se ishte nën ndikimin e alkoolit. Ai kishte mbështetur publikisht postimin e Klinakut dhe në një emision televiziv kishte thënë se “njerëz si Kurti duhet të vriten”.

Albin Kurti, në dëshminë e tij më 10 qershor 2025, tha se nuk ndihet i kërcënuar dhe ka besim në institucionet e sigurisë.

Të dy të akuzuarit përballen me veprën penale “Kanosja”. Klinaku ka paralajmëruar se në gjykim do ta ftojë Kurtin si dëshmitar.