Prokuroria Themelore në Prizren, në bashkëpunim me Inspektoratin Policor të Kosovës (IPK), ka realizuar një aksion të koordinuar që ka përfunduar me bastisjen e katër lokacioneve dhe arrestimin e katër personave të dyshuar.

Në mesin e të arrestuarve ndodhet edhe një zyrtar i lartë i Policisë së Kosovës me gradën kolonel. Sipas IPK-së, ndaj tyre ekziston dyshimi i arsyeshëm për përfshirje në veprat penale të detyrimit dhe shmangies nga tatimi, të cilat janë të parashikuara në Kodin Penal të Republikës së Kosovës.

Ky aksion është rezultat i një hetimi disa mujor të zhvilluar nga hetuesit e IPK-së në bashkëpunim me Prokurorinë në Prizren, me qëllim të luftimit të krimit dhe sigurimit të llogaridhënies institucionale.

Hetimet në terren janë duke vazhduar, ndërsa si pjesë e procedurës administrative, IPK ka rekomanduar suspendimin e kolonelit policor.

Inspektorati Policor ka theksuar rëndësinë e bashkëpunimit ndërinstitucional dhe përkushtimin për të luftuar çdo formë të krimit, përfshirë atë që mund të kryhet nga zyrtarë publik.