Mbi 100 organizata humanitare dhe të të drejtave të njeriut i kanë bërë thirrje qeverive të ndërmarrin masa urgjente për të ndalur përhapjen e urisë në Gazë dhe për të lehtësuar hyrjen e ndihmave.

Në një deklaratë të nënshkruar nga 111 organizata, përfshirë Mercy Corps dhe Këshillin Norvegjez për Refugjatët, theksohet se ndihmat jetike si ushqimi dhe barnat mbesin të bllokuara për shkak të rrethimit izraelit, ndërsa punonjësit humanitarë përballen me rrezik jete.

Organizatat kërkojnë armëpushim të menjëhershëm, hapje të kalimeve tokësore, heqje të pengesave administrative, si dhe rikthimin e ndihmës nën udhëheqjen e OKB-së. Ato po ashtu bëjnë thirrje për ndalimin e transferimit të armëve, për të ndalur përshkallëzimin e krizës.

Sipas autoriteteve në Gazë, mbi 800 persona janë vrarë kohët e fundit duke u përpjekur të sigurojnë ushqim, ndërsa numri i përgjithshëm i viktimave palestineze thuhet të jetë afër 60.000 që nga tetori 2023.