Ish-kryeministri i Kosovës, Isa Mustafa, ka kujtuar një vendim të ndërmarrë gjatë mandatit të tij në vitin 2017, që kishte të bënte me lirimin nga detyra të disa anëtarëve të kabinetit qeveritar, të cilët sapo kishin fituar mandatin si deputetë. Sipas tij, ky veprim ishte ndërmarrë për të respektuar Kushtetutën dhe për të shmangur shkeljen e saj, pavarësisht mungesës së Ligjit për Qeverinë në atë kohë.

Përmes një postimi në Facebook, Mustafa ka shkruar se lirimi nga detyra ishte bërë në konsultim me Zyrën Ligjore të Kryeministrisë dhe këshilltarin juridik, në përputhje me nenin 72 të Kushtetutës. Ai bëri të ditur se ishin liruar një zëvendëskryeministër dhe tetë ministra: Ramiz Kelmendi, Kujtim Shala, Avdullah Hoti, Enver Hoxhaj, Lutfi Zharku, Memli Krasniqi, Hykmete Bajrami, Arban Abrashi dhe Rasim Demiri.

Mustafa theksoi se veprimi nuk ishte bërë për të dhënë shembull zbatimi të Kushtetutës, por për të parandaluar që Qeveria të shkelte atë. Ai shtoi se të gjithë zyrtarët e liruar e kishin kërkuar vetë largimin nga detyra për të ushtruar mandatin e tyre të deputetit dhe për të shmangur mospërputhshmëri kushtetuese.

Ish-kryeministri vuri në dukje se sot, ndryshe nga viti 2017, ekziston një bazë e qartë ligjore që ndalon mbajtjen njëkohësisht të funksioneve në ekzekutiv dhe legjislativ.

Në fund, Mustafa shprehu shqetësimin e tij për qëndrimin në pushtet në kundërshtim me Kushtetutën dhe paralajmëroi se veprimet antikushtetuese duhet të sjellin përgjegjësi ligjore. Ai theksoi se qeveria nuk duhet të veprojë në kundërshtim me ligjin dhe se mosrespektimi i vendimeve të gjykatave mund të sjellë pasoja për individët përgjegjës.