Ushtarët amerikanë po vazhdojnë të japin ndihmë konkrete në Kosovë, jo vetëm për sigurinë, por edhe në përballjen me zjarret që kanë përfshirë vendin këtë verë.

Trupat nga Garda Kombëtare e Kentucky-t, që veprojnë në kuadër të KFOR-it, kanë ndërhyrë për të ndihmuar në shuarjen e disa prej këtyre zjarreve, përfshirë edhe një rast që rrezikonte trashëgiminë kulturore të vendit.

Bëhet fjalë për Manastirin e Deviçit në Skënderaj, i cili ishte në rrezik për shkak të flakëve. Ndërhyrja e shpejtë e Task Forcës së Aviacionit nga Garda e Kentucky-t bëri të mundur që manastiri të shpëtohej nga dëmet.

Departamenti Amerikan i Mbrojtjes ka reaguar për këtë rast përmes një postimi në rrjetin “X” (ish-Twitter), duke theksuar angazhimin dhe gatishmërinë e trupave amerikane në misione të tilla.

“Kur zjarret kërcënuan Manastirin e Deviçit në Kosovë, Garda e Kentakit, Task Forca e Aviacionit u vendos në aksion. Falë reagimit të tyre të shpejtë, manastiri u ruajt”, thuhet në postimin zyrtar të Departamentit të Mbrojtjes së SHBA-së.