Prokuroria Themelore në Prizren, Departamenti për Krime të Rënda, ka ngritur aktakuzë ndaj gjinekologut S.GJ., nën dyshimin se ka kryer veprën penale “Keqpërdorimi i pozitës apo autoritetit zyrtar”, sipas nenit 414 paragrafi 1 të Kodit Penal të Republikës së Kosovës.

Sipas aktakuzës, mjeku në fjalë dyshohet se më 31 janar 2022, duke shfrytëzuar pozitën e tij zyrtare në repartin e Gjinekologjisë Obstetrike të Spitalit të Përgjithshëm të Prizrenit, ka vepruar në kundërshtim me ligjin me qëllim përfitimi personal. Ai dyshohet se i ka refuzuar pacientes G.B. kërkesën për të kryer lindjen me operacion në spitalin publik, duke i sugjeruar që këtë proces ta realizojë në një klinikë private në Prishtinë – klinikë ku vetë i akuzuari është i angazhuar si mjek.

Në aktakuzë thuhet se mjeku e ka arsyetuar refuzimin duke përmendur praninë e pacientëve me COVID-19 në repartin e gjinekologjisë, dhe se i ka rekomanduar pacientes dhe bashkëshortit të saj, J.B., që ndërhyrja të kryhet në klinikën private. E njëjta paciente, sipas dokumentit të Prokurorisë, kishte qenë nën kujdesin e të pandehurit në të gjitha kontrollet e mëparshme, si në spitalin publik, ashtu edhe në klinikën private të tij në Prizren.

Lindja përfundimisht u krye në klinikën private në Prishtinë nga vetë i akuzuari, duke u shkaktuar dëm material familjes së pacientes në vlerë prej 1,500 euro.

Prokuroria ka kërkuar nga gjykata që pas shqyrtimit të çështjes dhe administrimit të provave, i akuzuari të shpallet fajtor dhe të dënohet në përputhje me ligjin.