Pas denoncimit për dhunë në familje, një person dyshohet të jetë vetëvrarë në stacionin policor në Suharekë

Një person i ndaluar në stacionin policor të Suharekës dyshohet se ka kryer vetëvrasje në dhomat e ndalimit gjatë orëve të hershme të mëngjesit të sotëm.

Lajmi është konfirmuar nga kryeprokurori i Prokurorisë Themelore në Prizren, Petrit Kryeziu, i cili njoftoi se i ndaluari ishte arrestuar me dyshimin për ushtrim të dhunës në familje ndaj vajzës së tij.

“Rreth orës 03:40 është raportuar një rast i dyshuar vetëvrasjeje në hapësirat e ndalimit të stacionit policor në Suharekë. Personi i ndaluar po mbahej për shkak të dyshimeve për dhunë në familje. Rasti është regjistruar si hetim i vdekjes,” deklaroi Kryeziu.

Sipas tij, personi në fjalë ishte i njohur për organet e rendit dhe kishte qenë i përfshirë edhe më parë në raste penale të kësaj natyre dhe të tjera.

Autoritetet përkatëse janë duke zhvilluar hetimet për të sqaruar plotësisht rrethanat e ngjarjes.