Familjet në Kosovë po kthehen drejt energjisë diellore për të kursyer

Në Kosovë po rritet ndjeshëm interesimi për panelet diellore, teksa çmimet e larta të energjisë dhe subvencionet shtetërore po nxisin familjet të investojnë në vetëkonsum. Shembull është familja Rashiti nga Lipjani, e cila me një sistem diellor prej 7 kW, ka ulur faturën mujore nga 70 në vetëm 3 euro.

Investimi prej 7,500 eurosh pritet të kompensohet pjesërisht nga një subvencion prej 1,500 eurosh nga Ministria e Ekonomisë. Kjo ministri ka mbështetur qindra familje dhe biznese gjatë vitit të kaluar për instalimin e sistemeve të ngjashme.

Sipas Zyrës së Rregullatorit për Energji, vetëm këtë vit janë dhënë 671 autorizime për vetëkonsum – një rritje e madhe krahasuar me vitet e mëparshme. Kosova synon që deri më 2031, 35% e energjisë të vijë nga burimet e ripërtërishme, ndërsa aktualisht mbi 90% e saj prodhohet nga thëngjilli.