Një aksident trafiku me pasoja fatale ka ndodhur mbrëmjen e së mërkurës në Mitrovicë të Jugut.

Sipas informatave zyrtare, më 5 shkurt 2026, rreth orës 18:25, në rrugën “Ulqini”, një veturë ka goditur një këmbësor. Si pasojë e aksidentit, këmbësori ka pësuar lëndime të rënda trupore dhe është dërguar me urgjencë për trajtim mjekësor në Shërbimin Spitalor Klinik Universitar të Kosovës (SHSKUK).

Pavarësisht përpjekjeve të stafit mjekësor, autoritetet spitalore kanë konfirmuar më vonë se viktima ka ndërruar jetë si pasojë e plagëve të marra.

Viktima është identifikuar si mashkull rreth 76-vjeçar. Me urdhër të prokurorit kompetent, trupi i pajetë është dërguar në Institutin e Mjekësisë Ligjore për obduksion.

Hetimet lidhur me rastin janë duke u zhvilluar nga njësitet përkatëse të Policisë së Kosovës, me qëllim të sqarimit të plotë të rrethanave të aksidentit.