Ish-futbollisti dhe ish-drejtori sportiv i Real Madridit, Jorge Valdano, ka komentuar deklaratat e trajnerit Álvaro Arbeloa pas fitores 2-0 të madrilenëve ndaj Levantes, të cilat kanë shkaktuar debat të madh në opinionin sportiv.

Valdano u shpreh skeptik në lidhje me mënyrën se si Arbeloa iu referua fishkëllimave që presidenti Florentino Pérez mori nga një pjesë e tifozëve në “Santiago Bernabéu”, të cilët kërkuan dorëheqjen e tij. Sipas Valdanos, zbulimi i këtyre “lëvizjeve politike” nuk është një ide e mirë, pasi dëmton imazhin e klubit.

Në konferencën për shtyp, Arbeloa deklaroi se e di burimin e fishkëllimave, duke thënë se ato nuk vijnë nga njerëz që nuk e duan Florentino Pérezen, por nga ata që, sipas tij, nuk e duan Real Madridin. Ai theksoi se nuk do të mashtrohet dhe e cilësoi Florentino Pérezen si “personin më të rëndësishëm të klubit, së bashku me Santiago Bernabéun”.

Deklaratat e trajnerit të ri të Real Madridit kanë nxitur reagime të shumta, ndërsa qëndrimi i Valdanos i shtohet debatit mbi mënyrën se si çështje të tilla duhet të trajtohen publikisht brenda klubit.