Policia e Kosovës ka rikujtuar shoferët se shiritin emergjent duhet ta përdorin vetëm automjetet e autorizuara dhe vetëm në situata emergjente, si policia, ndihma e shpejtë dhe zjarrfikësit. Abuzimi me këtë shirit konsiderohet shkelje serioze e ligjit dhe rrezikon sigurinë e trafikut.

Rreshteri Vedat Zuka tha se disa shoferë vazhdojnë të kalojnë kolonat duke përdorur shiritin pa arsye të justifikuar. Për këto shkelje, ligji parashikon gjoba deri në 200 euro dhe ndalesë për drejtimin e automjetit për 3 muaj. Për shoferët me patentë ndërkombëtare, masa ndëshkuese është e dyfishuar.

Ai gjithashtu vuri në dukje se vendosja e kamerave të sigurisë në kryeqytet ka ndihmuar në identifikimin e shkelësve dhe rritjen e respektimit të rregullave, duke apeluar që qytetarët të respektojnë këto rregulla për të ruajtur sigurinë në trafik.